Մարդու մարմնի նորմալ ջերմաստիճանը պետք է լինի 36-37°C շրջակայքում, թեև այն կախված է՝
- տվյալ անձից և նրա տարիքից
- մինչև ջերմությունը չափելը ֆիզիկական ակտիվությունից
- օրվա ժամից
- ջերմաչափման շրջանից։
Համարվում է, որ մարդը ջերմում է, եթե նրա մարմնի ջերմաստիճանը 38°C կամ ավելի բարձր է։
Մարմնի բարձրացած ջերմաստիճանը մեր օրգանիզմի նորմալ պատասխանն է վարակին կամ բորբոքմանը։ Ջերմության բարձրացման ամենահաճախ հանդիպող պատճառը մրսածությունն է կամ գրիպը։
Ինչպե՞ս չափել ջերմաստիճանը
Մարմնի ջերմաստիճանը չափում են ջերմաչափով։ Հնարավորության դեպքում խորհուրդ է տրվում չափումը կատարել թվային, այլ ոչ թե սնդիկային ջերմաչափով։
Մարմնի ջերմաստիճանը չափելու համար ջերմաչափը դնելու ստանդարտ տեղը թևատակն է (անութափոս)։
Թևատակի ջերմաստիճանը չափելու համար՝
- թևատակը մաքրեք-չորացրեք մաքուր սրբիչով
- բարձրացրեք աջ կամ ձախ ձեռքը և ջեմաչափը դրեք թևատակի շրջանում՝ չափիչ ծայրը հպելով թևատակի մաշկին
- զգուշությամբ իջեցրեք ձեռքը և հպեք ձեր մարմնին՝ կիպ պահելով ջերմաչափը թևատակում
- պահեք ջերմաչափը թևատակում այնքան, որքան նշված է տվյալ ջերմաչափի տեղեկատվական թերթիկում
- հանեք ջերմաչափը և կարդացեք ձեր մարմնի ջերմաստիճանի ցուցմունքը։
Էրիկ Գևորգյան 